الجهاز الهضمي له دور أساسي ومؤثر في حياة كل إنسان لإن عن طريقه بيتم هضم وإمتصاص الأكل وتوفير كل المكونات اللازمة لبناء الخلايا وتوليد الطاقة للجسم وكمان الجهاز الهضمي له دور مهم جدا في المناعة وفي التأثير على مزاج الأفراد. الأشخاص اللي عندهم متلازمة داون بيبقى عندهم تحديات كبيرة فيه وبتكون المشاكل الهضمية منتشرة جدا أكثر بكتير من الأخرين. متلازمة داون بتسبب تغييرات في الجهاز الهضمي بسبب العوامل الوراثية اللي بتغير في تكوين ووظيفة الأمعاء والمشاكل ممكن تظهر من أول ما الطفل يتولد.
الإمساك والسيلياك من المشاكل المنتشرة جدًا عندهم وبتحتاج متابعة طبية مستمرة ونظام غذائي صحي متوازن وكمان الوعي بالمشكلة والتدخل المبكر الصحيح هم المفتاح الأساسي لتحسين حياة الطفل وكل الأسرة ودايمًا ما تنساش إن الطبيب هو المرجع الأول لو ظهرت أعراض غير معتادة أو لو المشكلة استمرت. حنستعرض هنا المعلومات عن الجهاز الهضمي عندهم، وأسباب المشاكل دي بالإضافة لمشاكل أخرى وأفضل طرق للعلاج والوقاية عشان نساعدهم يعيشوا حياة صحية ومريحة.
الجهاز الهضمي ومتلازمة داون
- فتحة شرج ضيقة جدا أو مقفولة تماما Imperforate Anus – حوالي 3% من الأطفال المصابين بمتلازمة داون بيتولدوا بفتحة شرج مقفولة (لا توجد فتحة شرج مفتوحة لخروج البراز) وبيتم تشخيص الحالة دي بعد الولادة مباشرة لما طبيب الأطفال بيفحص الطفل وبيتم تصحيح المشكلة دي بإجراء جراحي بسيط جدا.
- انسداد الاثني عشر Duodenal Atresia – لو لقيتي المولود الجديد المصاب بمتلازمة داون بيعاني من قيء شديد من ساعة الولادة فده ممكن يكون معناه إنه من بين حوالي 5% من الأطفال اللي بيعانوا من انسداد الاثني عشر(الجزء الأول من الأمعاء الدقيقة) اللي بيحصل خلال فترة الحمل وده بيخلي الأكل لما يتهضم ما يقدر يكمل طريقه في الجهاز الهضمي ويحصل القئ. بيتم عمل جراحة لتصحيح هذه المشكلة.
- مرض هيرشسبرونغ Hirschsprung Disease– ما بين 2 – 15% من الأطفال المصابين بمتلازمة داون بيتولدوا بالمرض ده اللي بيكون فيه خلل في تكوين الجزء الأخير من الأمعاء الغليظة بسبب نقص في بعض الخلايا العصبية والنتيجة بتكون إنهم ما بيقدروش يتبرزوا وبنلاقي الطفل في مرحلة الطفولة المبكرة بيعاني من انتفاخ البطن والقيء بالإضافة لعدم القدرة على التبرز أو بالإمساك الشديد. لو طفلك ما قدرش يتبرز في الأيام الأولى بعد الولادة بيتم عمل الأشعة له بالإضافة لأخذ عينة صغيرة من نسيج المستقيم لفحصها تحت الميكروسكوب والوصول للتشخيص الصحيح والعلاج بيكون عن طريق الجراحة لإزالة الجزء ده من القولون.
- الناسور الرغامي المريئي Tracheoesophageal fistula – لو لقيتي المولود الجديد المصاب بمتلازمة داون بيطلع فقاقيع من الحليب وهو بيرضع وبيتعرض للاختناق كل شوية فممكن يكون من بين 1% من الأطفال اللي بيعانوا من وجود اتصال بين القصبة الهوائية والمريء وده بيخلي الأكل يدخل القصبة الهوائية والرئتين. بيتم تشخيص الحالة من خلال أشعة على الصدر وبيتم قفل الفتحة الموجودة بالجراحة.
- صعوبة الرضاعة الطبيعية – يعاني أغلب أطفال متلازمة داون من ضعف في العضلات وده بيسبب صعوبة في الرضاعة الطبيعية ولكن بيتم التغلب عليها بمساعدة أخصائي الرضاعة الطبيعية اللي بيساعد الأمهات تفهم الأوضاع المناسبة للرضاعة وغيرها من النصايح المهمة التانية (غرجعي للمقالة عن الرضاعة الطبيعية).
- ارتخاء العضلات Hypotonia – اللي موجودة عند أغلب أطفال متلازمة داون بيأثر على حركة الأمعاء بشكل عام وبالتالي الأكل بيتحرك ببطء في الجهاز الهضمي وده ممكن يؤدي بسهولة للإمساك أو الانتفاخ وكمان ضعف حركة الجهاز الهضمي ممكن تخلي الطفل يعاني من مشاكل في امتصاص الفيتامينات والمعادن اللي بتؤدي إلى سوء تغذية لو ما إخدناش بالنا من بدري علشان نهتم بنوعية الأكل والمكملات الغذائية.
- الارتجاع المريئي Gastroesophageal reflux (GERD) – بتحصل لحوالي 1 – 5% من الأطفال وبيكونوا بيعانوا من أعراض زي حرقان في المعدة أو عدم تحمل بعض الأطعمة وممكن تلاقيهم بيعيطوا وقت الرضاعة. الارتجاع المريئي غالبا بيحصل بسبب ارتخاء الحلقة العضلية في نهاية المريء وده بيخلي الحمض يطلع من المعدة للمريء ويسبب الحموضة والقيء المتكرر وممكن يعمل التهابات مزمنة في الحلق. تناول العلاج الدوائي بيساعد بشكل كبير في تحسن الأعراض عند معظم الأفراد.
- الإمساك – وده من أكتر المشاكل اللي بتقابلهم، وسببه الأساسي ضعف حركة الأمعاء وارتخاء العضلات وممكن بسبب كسل الغدة الدرقية أو المشاكل التانية اللي إتكلمنا عنها قبل كدة وكمان ممكن بسبب قلة الحركة عند بعض الأطفال أو الكبار بالإضافة لتناول نظام غذائي قليل في الألياف أو شرب مياه قليلة وده بيزود المشكلة. الأم بتلاحظ إن الطفل أو الشخص بيعمل حمام أقل من 3 مرات في الأسبوع والبراز بيكون ناشف وأحيانًا بيكون فيه ألم شديد أثناء التبرزمع انتفاخ البطن أو فقدان الشهية. لو الإمساك إستمر لفترات طويلة ممكن يعمل شرخ في فتحة الشرج أو التهاب أو بواسير. لعلاج الإمساك لازم نعرف السبب الأساسي له إيه ويتم علاجه بطريقة صحيحة وممكن الطبيب يوصف بعض الملينات الآمنة بالإضافة للإهتمام بنظام غذائي صحي نزود فيه الخضار والفواكه والبقوليات اللي تبقى موجودة في كل وجبة. شرب المياه مهم جدًا وكمان نشجعهم على الحركة ولو ممارسة رياضة بسيطة زي المشي. في بعض الحالات ممكن الإمساك يكون ناتج عن مشاكل سلوكية عند الطفل وعلشان كدة مهم استشارة أخصائي في النمو السلوكي.
- السمنة وزيادة الوزن – مافيش أرقام محددة بتتكلم عن نسبة السمنة عند الأشخاص المصابين بمتلازمة داون ولكن نقدر نقول إن دي مشكلة منتشرة بشكل كبير. فيه أسباب طبية بتُفسر ليه السمنة بتحصل زي كسل الغدة الدرقية أو انخفاض معدل الأيض بالإضافة طبعا لتناول الأكل بشكل كبير وعدم ممارسة الرياضة بشكل منتظم وعلشان كدة مهم جدا نبني معاهم عادات غذائية صحية في سن مبكرة للوقاية من السمنة وخصوصا في مرحلة المراهقة والبلوغ. نخلي بالنا إن السمنة مرتبطة بمشاكل صحية كتيرة زي ارتفاع ضغط الدم وداء السكري. الاهتمام بوزن الشخص المصاب بمتلازمة داون أمر مهم جدا للحفاظ على صحته زحمايته من كتير من الأمراض.
- مرض السيلياك (حساسية الجلوتين) – السيلياك مرض مناعي مزمن بيحصل لما الخلايا المناعية اللي في جسمك بتهاجم الأمعاء الدقيقة لو أكلت جلوتين (وده بروتين موجود في القمح والشعير والشوفان). حوالي 6 – 12% من الأشخاص اللي عندهم متلازمة داون معرضين للإصابة بمرض السيلياك. الأعراض متنوعة ما بين إمساك أو إسهال المزمن بالإضافة لألم في البطن وفقدان وزن ملحوظ وتأخر في النمو أو قصر القامة عند الأطفال وتأخر البلوغ أو ظهور طفح جلدي. ساعات برضه بيبقى فيه أعراض غير واضحة زي التعب وضعف العظام أو تسوس الأسنان. علشان نشخص المرض ده بنعمل تحاليل دم معينة ولو النتائج طلعت إيجابية غالبًا الطبيب هيطلب يعمل منظار وأخذ عينة بسيطة من الأمعاء للتأكد. العلاج الوحيد هو الامتناع التام عن كل الأكلات اللي فيها جلوتين ولازم العيلة تتعلم تقرا المكونات وتختار المنتجات الخالية من الجلوتين والاعتماد على الأطعمة اللي زي الرز والبطاطس والذرة بدل المخبوزات المعمولة بدقيق القمح والشعير والشوفان.
نصائح عملية للأهالي ومقدمي الرعاية
- تابع وزن الطفل أو الشخص بانتظام ولو فيه أس تغيير مفاجئ لازم تستشير الطبيب.
- لو فيه أي أعراض هضمية مستمرة زي الانتفاخ أو القيء أو حتى تأخر في النمو لازم تروح للطبيب.
- نظم مواعيد الأكل وخلي الوجبات متوازنة فيها ألياف وسوائل دايمًا.
- طلب التحاليل الدورية مهم وخصوصًا لو فيه مشاكل هضمية أو ضعف مناعة.
- لو كان الطفل مصاب بالسيلياك خلي البيت كله واعي بأهمية اختيار أكلات خالية من الجلوتين.
References
https://ndss.org/resources/gastrointestinal-tract-syndrome
https://pmc.ncbi.nlm.nih.gov/articles/PMC4017552
https://dsagsl.org/wp-content/uploads/2019/02/gastrointestinal_problems.pdf
