الرضاعة الطبيعية لها فوايد كبيرة جدًا للأم وللطفل وخصوصًا اللي عنده احتياجات صحية خاصة. متلازمة داون مش معناها إن طفلك ما يقدرش يرضع طبيعي زي ما فيه كلام مغلوط بيقول كدة. بالعكس، الرضاعة الطبيعية ممكنة جدا بس أحيانًا الطريق بيكون مش سهل وده اللي هنشرحه خطوة بخطوة في المقالة دي.
ليه الرضاعة الطبيعية مهمة جدًا لطفلك؟
الرضاعة الطبيعية مش بس بتغذي الطفل، دي بتقويه وتحميه وتساعدك تبني علاقة صحية جميلة متكاملة بينك وبينه. الأيام والأسابيع الأولى من الرضاعة الطبيعية فرصة مثالية لكِ ولطفلكِ علشان تتعرفوا على بعض وتساعدك تكتشفي شوية صفات جسدية خاصة بطفلك ممكن تؤثر على رحلة الرضاعة الطبيعية. فوايد الرضاعة الطبيعية:
- تقوية وتعزيز المناعة – لبن الأم فيه أجسام مضادة بتساعد جسم الطفل يواجه العدوى وده مهم جدًا لأن الأطفال اللي عندهم متلازمة داون بيكونوا عرضة أكتر للإصابة بالعدوى التنفسية والفيروسية.
- تقوية عضلات الفم – الرضاعة بتشتغل على عضلات الفك واللسان وبتفويها وده بيساعد الطفل يتحسن في الكلام والأكل بعدين.
- دعم النمو العصبي – الرضاعة الطبيعية بتحسن التواصل بين الأعصاب والمخ وخصوصًا مع أوضاع معينة يكون جلد الأم ملامس لجلد الطفل (skin-to-skin)
- تقليل مشاكل التنفس والنوم – الرضاعة بتقوي عضلات الحنجرة والبلعوم وبتقلل من مشكلة توقف التنفس أثناء النوم اللي بتحصل عند بعض الأطفال.
نصائح لتسهيل الرضاعة:
لو كنتي لسه في البداية وحاسة إنك متوترة فالنصائح دي هتفيدك جدًا:
- إبدئي بالجلد على الجلد بعد الولادة مباشرة وحطي طفلك على جلدك مباشرة بحيث جلدك يلامس جلده وده بيحفّز الرضاعة وبيهدّي الطفل.
- رضعيه في أوقات منتظمة بس برضه استجيبي لاحتياجاته يعني لو بدأ يعيط أو يبص لصدرك خارج مواعيد الرضاعة فدي علامة إنه جعان.
- استشيري استشاري رضاعة طبيعية أو أخصائي نطق لو لاحظتي مشاكل في المص أو البلع.
- لو الرضاعة الطبيعية صعبة، ممكن تشفطي اللبن وتقدميه بالببرونة أو أنبوب تغذية حسب نصيحة الطبيب.
- اتمرني على الصبر لإن كل طفل مختلف والتطور بيجي على مراحل خطوة خطوة.
تحديات ممكن تقابليها في الرضاعة
الصورة مش وردية أوي وبرضه مش صعبة بس مهم تفهمي إن حيكون فيه تحديات وصعوبات وبإذن الله توصلي لحلول لها:
- ضعف العضلات – يعاني الأطفال المصابون بمتلازمة داون من ضعف في العضلات وده بيخليهم يتعبوا بسرعة وما يقدروش على الإستمرار في مص الثدي بشكل فعال والحل في وضعية الرضاعة إن رأسه تبقى بوضعية مرتفعة وتعملي دعم للفك باليد بلطف.
- النعاس المستمر – كتير من الأطفال بيناموا أثناء الرضاعة فحاولي دايما ترضعيه وهو صاحي واعملي حركات خفيفة زي إنك تحركي رجله وتلاعبيه علشان يفضل صاحي.
- مشاكل البلع أو الارتجاع – لو في صعوبة في البلع ممكن تستشيري دكتور أطفال علشان تعرفي أفضل وضعية للطفل خلال الرضاعة.
- زيادة الوزن البطيئة – لو وزن الطفل مش بيزيد بالنسبة المطلوبة الصحية، ممكن الدكتور يقترح إضافة لبن صناعي بجانب الرضاعة الطبيعية.
طبعا كل طفل مختلف وممكن ما تقابليش التحديات دي أو تواجهي بعضها فقط ولو فيه صعوبات كبيرة ضروري تطلبي الدعم والمساعدة وده شيء طبيعي جدا عند كل الأمهات في بدايات الرضاعة علشان تتعلمي المناسب لكم إنتم الإتنين.
في البدايات، ممكن برضه تتعلمي تشفيط حليب الثدي وترضعي طفلك بإستخدام زجاجة لحد ما تعرفي وتتعلمي كل الأوضاع المناسبة طفلكِ. حتحتاجي تعملي شفط الحليب من 8 إلى 10 مرات خلال 24 ساعة منهم مرة واحدة على الأقل خلال الليل علشان تزودي إدرار الحليب. ممكن التشفيط يبقى يدويًا أو باستخدام مضخة. يتم تخزين لبن الأم في الثلاجة لمدة 3 – 5 أيام وفي الفريزر لمدة 6 أشهر ولا يعاد تجميده بعد الذوبان.
دور الأسرة والدعم العاطفي
الرضاعة لطفل عنده متلازمة داون مش مجرد أمر جسدي، ده كمان له بعد نفسي وعاطفي كبير وتشجيع الأسرة بيعمل فرق ضخم. دعم الأم نفسيًا من الأب والجدة وأفراد الأسرة حيساعدها تتجاوز التوتر وتكمل مشوار الرضاعة بسهولة. الدعم النفسي كمان بيريّح الطفل لإنه بيحس بالأمان لما يكون في جو مليان حب وطمأنينة، وده بينعكس على قدرته في المص والرضاعة. لازم تعرفي إن الرضاعة رحلة بتاخد وقت مش اختبار وكل محاولة بتعمليها بتعتبر نجاح، حتى لو كانت قصيرة.
تغذية الأم وتأثيرها على الطفل
علشان تدي ابنك أفضل تغذية من خلال لبنك، ضروري إنت كمان تهتمي بأكلك ونظامك الغذائي وتاخدي إحتياجاتك بالظبط:
- زودي الأطعمة الغنية بالبروتين زي البيض واللحوم من الأسماك والدجاج واللحوم الحمراء والبقوليات زي الفول والعدس والحمص بالإضافة لمنتجات الألبان.
- اشربي سوائل كتير وخصوصًا الماء وتناولي الخضروات والفواكه الغنية بالمياه مثل الكابوتشا والخيار والبطيخ والطماطم.
- ابتعدي عن المنبهات والمشروبات الغازية قدر الإمكان.
- إبتعدي عن المأكولات السريعة الجاهزة اللي مليانة شكريات ودهون مهدرجة وملح.
- إبتعدي عن اللحوم المصنعة
- لو بتاخدي أدوية، اسألي الطبيب هل لها تأثير على الرضاعة ولا لأ.
البيئة المناسبة للرضاعة
تهيئة مكان هادي ومريح حيساعدك تركزي في الرضاعة ويخلي الطفل يحس بالأمان:
- استخدمي كرسي مريح وافردي ضهرك كويس.
- ممكن تضيفي موسيقى هادئة أو نور خفيف.
- وجود وسادة رضاعة تحت الطفل بيريّح عضلاته وبيخليه يمص بطريقة أفضل.
نصائح إضافية
هنا بعض الطرق اللي نجحت مع أمهات أطفال عندهم متلازمة داون:
- استخدام تقنية مساعدة المص Nipple Shields وهى أداة طبية ممكن تساعد لو الطفل مش قادر يتحكم في المص.
- التدرج في الفطام وما تستعجليش إدخال الرضاعة الصناعية إلا بعد تجربة كل الطرق الطبيعية.
- مهم جدا تكتبي ملاحظاتك اليومية عن عدد مرات الرضاعة ومدتها علشان تتابعي التقدم وتشوفي الفرق عامل إزاي.
متى تحتاجي دعم خارجي؟
في الحالات التالية ضروري تروحي للطبيب أو استشاري رضاعة:
- الطفل بيرفض الرضاعة تمامًا.
- بيظهر عليه علامات اختناق أو كحة أثناء الرضاعة.
- مفيش زيادة في الوزن لأكتر من أسبوعين.
- الأم بتحس بألم شديد في الثديين.
في الحالات دي تدخل المتخصص مش بس هيريّحك لأ ده كمان ممكن ينقذ طفلك من مشاكل صحية كتير ممكن تبقى موجودة. وفي النهاية انتِ مش لوحدك ودايما إحنا معاكي بنساعدك. رحلة الرضاعة لطفل عنده متلازمة داون ممكن تكون مليانة تحديات بس كمان فيها أوقات انتصارات كثيرة وكل لحظة بتقضيها معاه هي خطوة للأمام. خليكي دايما عندك إيمانك بنفسك وقدراتك وتأكدي إن دعمك لطفلك حيوصلكم لنجاحات كثيرة.
References
Breastfeeding a baby with Down Syndrome – The Breastfeeding Network
